Натиҷагирӣ аз фаъолияти КВД БА ҶТ “Амонатбонк” дар нимсолаи якум ва нақшаҳо барои нимсолаи дуюм дар соли 2025

Санаи 14-уми июли соли ҷорӣ таҳти роҳбарии Раиси Раёсати Корхонаи воҳиди давлатии “Бонки амонатгузории Ҷумҳурии Тоҷикистон “Амонатбонк”” Салимзода А.А. ва бо иштироки муовинони Раиси Раёсат Ризвонзода Ф.З., Сафарзода Р.С. инчунин сардори Раёсати молияи Дастгоҳи иҷроияи Президенти Ҷумҳурии Тоҷикистон Ҷумъазода Маҳмуд, сардори сарраёсати сиёсати буҷетӣ дар соҳаҳои воқеии иқтисодиёти вазорати молияи Ҷумҳурии Тоҷикистон Ҷонмамадзода Меҳринамо, муовини якуми директори Агентии суғуртаи иҷтимоӣ ва нафақаи назди Ҳукумати Ҷумҳурии Тоҷикистон Қурбонзода Усмоналӣ, сардори идораи бозрасии бонкҳои департаменти назорати бонкии Бонки миллии Тоҷикистон Раҳимзода Иброҳим, сардорони воҳидҳои сохтории дастгоҳи марказӣ ва мудирони филиалҳои “Амонатбонк” ҷаласаи васеъ оид ба ҷамъбасти натиҷаҳои фаъолияти КВД БА ҶТ “Амонатбонк” дар нимсолаи якуми соли 2025 ва нақшаҳо барои нимсолаи дуюми соли ҷорӣ баргузор гардид.

Дар қисмати аввали ҷаласа муовини Раиси Раёсат Ризвонзода Ф.З. баромад намуда, доир ба фаъолияти КВД БА ҶТ “Амонатбонк” давоми нимсолаи якуми соли 2025-ум ба ҳозирин маълумот доданд.

Қайд карда шуд, ки дар давраи ҳисоботӣ Бонк тамоми кӯшишу ғайрати худро ба иҷрои самараноки дастуру супоришҳои Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, ки дар Паёми солонаи худ баён дошта буданд, инчунин ба татбиқи самтҳои афзалиятноки фаъолияти Бонк дар соли 2025 равона намуданд. Дар натиҷа, фоидаи Бонк то андозбандӣ ба 96,1 млн. сомонӣ ва пас аз андозбандӣ ба 76,9 млн. сомонӣ расид, ки ин нишондиҳанда нисбат ба ҳамин давраи соли 2024 — 10,6 фоиз зиёд мебошад.

Ҳаҷми сармояи Бонк дар нимсолаи якуми соли 2025 зиёда аз 1 млрд. сомониро ташкил дода, нисбат ба ҳамин давраи соли гузашта 12,4 фоиз афзоиш ёфтааст. Дороиҳои умумии Бонк дар давраи ҳисоботӣ 9,6 млрд. сомонӣ ва уҳдадориҳои Бонк 8,6 млрд. сомониро ташкил доданд, ки мутаносибан нисбат ба ҳамин давраи соли 2024 — 20,5% ва 21,6% зиёд мебошанд. Дар ин давра Бонк ба буҷетҳои ҷумҳуриявӣ ва маҳаллӣ дар маҷмуъ 62,1 млн. сомонӣ маблағҳои андоз ва дигар пардохтҳои ҳатмиро пардохт намудааст, ки нисбат ба ҳамин давраи соли гузашта 22,6 фоиз бештар аст.

Амонатбонк ҷиҳати саҳмгузории назаррас дар иқтисодиёти миллӣ тавассути пешниҳоди қарзҳои дастрас ва дарозмуддат, инчунин бо дарназардошти эълон шудани солҳои 2022–2026 ҳамчун “Солҳои рушди саноат”, пайваста тадбирҳои амалӣ ҷиҳати афзоиши ҳиссаи қарздиҳӣ меандешад.

Дар нимсолаи якуми соли 2025, Бонк аз ҳисоби захираҳои дохиливу хориҷӣ ба зиёда аз 28 ҳазор мизоҷ беш аз 1 млрд. сомонӣ қарз пешниҳод намуд. Ин нишондиҳанда нисбат ба ҳамин давраи соли 2024, 7,9% афзоиш ёфтааст.

Ҳамзамон, Бонк барои дастгирии сиёсати иҷтимоии Ҳукумати Ҷумҳурии Тоҷикистон дар самти таъмини шароити беҳтари зиндагии аҳолӣ, ба қарзҳои истеъмолӣ ва ипотекӣ низ аҳамияти хос медиҳад. Дар нимсолаи якуми соли 2025, ба 113 нафар қарзҳои ипотекӣ дар ҳаҷми 34 млн. сомонӣ дода шудааст, ки ин нишондод 4 маротиба бештар нисбат ба ҳамин давраи соли гузашта мебошад.

Амонатбонк фаъолияти худро дар самти ҷалби сармоягузорӣ ба иқтисодиёти кишвар ва дастгирии соҳибкорӣ низ вусъат бахшидааст. Аз ҷумла, аз ҳисоби хатти қарзии Бонки миллии фаъолияти иқтисоди хориҷии Ҷумҳурии Ӯзбекистон – 15,6 млн. доллари ИМА барои воридоти мол ва маҳсулот. Аз ҳисоби хатти қарзии аккредитивӣ бо ҶС “KAZAKHEXPORT” (Ҷумҳурии Қазоқистон) – 24,6 млн. доллари ИМА ба ширкатҳои ватанӣ пешниҳод шудааст. Татбиқи амалии шартнома бо Бонки давлатии рушди Хитой оғоз гардида, дар ин давра 400 ҳазор доллари ИМА ба ширкатҳои ватанӣ маблағгузорӣ гардид.

Сатҳи баланди пардохтпазирӣ яке аз нишондиҳандаҳои асосии устуворӣ ва эътимоднокӣ ба ҳисоб меравад. Иҷроиши ин нишондиҳанда дар Амонатбонк дар сатҳи зарурӣ таъмин гардида, бақияи умумии пасандозҳо (шахсони воқеӣ ва ҳуқуқӣ) дар Амонатбонк ба санаи 30 июни соли 2025 ба 7,7 млрд. сомонӣ расида, нисбат ба ҳамин давраи соли 2024 31,7% афзоиш ёфтааст. Бонк аз рӯи ин нишондиҳанда мавқеи намоёнро дар низоми бонкии кишвар ишғол мекунад.

Амонатбонк дар доираи иҷрои фармони Президенти Ҷумҳурии Тоҷикистон, муҳтарам Эмомалӣ Раҳмон аз 22 июни соли 2023, №586 «Дар бораи тадбирҳои вусъат додани ҳисоббаробаркунии ғайринақдӣ», ҳамзамон ҷиҳати пурра ҷорӣ намудани низоми пардохтҳои ғайринақдӣ дар ҳамаи соҳаҳо ва рақамикунонии низоми молиявӣ ва андоз, тадбирҳои зарурӣ андешида истодааст.

Дар ин замина, 1 092 адад постерминал дар нозироти андоз, филиалҳо ва марказҳои хизматрасонии бонкӣ, 3 994 адад дар муассисаҳои давлатӣ ва бахши хусусӣ, дар маҷмӯъ 5 086 адад таҷҳизоти электронӣ мавриди истифода қарор дода шудааст.

Бо мақсади тақвияти хизматрасониҳои фосилавӣ, замимабарномаи мобилии “Амонатмобайл” бо низомҳои технологӣ ва маълумотии муассисаҳои давлатӣ мутобиқ гардонида шудааст.

Ҳамзамон, насби QR-рамзҳои ягона идома дошта, то санаи ҳисоботӣ 1 140 адад дар бахши хусусӣ ва 2 518 адад дар муассисаҳои давлатӣ, дар маҷмӯъ 3 658 адад насб шудааст.

Баъд аз маърӯзаи муовини Раиси Раёсат мудирони филиалҳои “Амонатбонк” оид ба фаъолияти филиалҳо дар давоми нимсолаи якуми соли 2025-ум ба Раиси Раёсат ҳисобот доданд.

Инчунин намояндагон аз Раёсати молияи Дастгоҳи иҷроияи Президенти Ҷумҳурии Тоҷикистон, Вазорати молияи Ҷумҳурии Тоҷикистон, Агентии суғуртаи иҷтимоӣ ва нафақаи назди Ҳукумати Ҷумҳурии Тоҷикистон ва Бонки миллии Тоҷикистон баромад намуда, оид ба натиҷаи фаъолияти “Амонатбонк” давоми нимсолаи якуми соли 2025, фикру ақидаҳои худро иброз намуда, нишондодҳои молиявии Амонатбонкро дар давоми нимсолаи якуми соли 2025 мусбӣ арзёбӣ намуда, якчанд тавсияҳои дахлдор ҷиҳати бозҳам рушд бахшидани фаъолияти Бонк пешниҳод намуданд.

Дар идомаи ҷаласа Раиси Раёсати КВД БА ҶТ “Амонатбонк” Салимзода А.А. нахуст ба Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон барои дастгирии доимии рушди низоми бонкии мамлакат миннатдории худро баён намуда, иброз доштанд, ки фаъолияти Бонк дар асоси дастуру супоришҳои паёмҳои ҳамасолаи Роҳбарияти Олии кишвар ва вобаста ба он, супоришҳои БМТ ҳамчун бонки марказӣ ба роҳ монда шудааст.

Дар маҷмуъ, аъзоёни Раёсат, роҳбарони воҳидҳои сохтории дастгоҳи марказӣ ва мудирони филиалҳо вазифадор мебошанд, ки якҷо бо тамоми кормандон ҳадаф ва нақшаҳои қабулгардидаи Ҳукумати кишвар ва бонкро сари вақту босифат таъмин намоянд.

Дар интиҳои ҷаласа аз ҷониби Раиси Раёсат баҳри бозҳам мустаҳкам намудани мавқеи Бонк дар низоми бонкӣ, бартараф намудани камбудиҳои ҷойдошта ва пешгирию идоракунии хавфҳои Бонк, дар назди тамоми воҳидҳои сохтории саридора ва филиалҳои Бонк вазифаҳои зерин гузошта шуданд.

Таъмини иҷрои саривақтии дастуру супоришҳои паёми солонаи Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон, зиёд намудани ҳаҷми қарздиҳӣ, дастгирии соҳибкорон, аз ҷумла занони соҳибкор, дастгирии ҳунармандон ва косибон, зиёд намудани шумораи занону бонувон дар филиалҳои Бонк, пурзӯр намудани корҳо дар самти баргардонидани қарзҳои батаъхирафтода ва ғайринизомӣ, фурӯши амволҳои дар тавозуни Бонк қарордошта, самтҳои афзалиятнок барои нимсолаи дуюми соли 2025 муқаррар карда шуд.

Раиси Раёсати Бонк бори дигар ба Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, Ҳукумати Ҷумҳурии Тоҷикистон, Вазорати молияи Ҷумҳурии Тоҷикистон, Бонки миллии Тоҷикистон, Агентии суғуртаи иҷтимоӣ ва нафақаи назди Ҳукумати Ҷумҳурии Тоҷикистон сипосгузории худро ҷиҳати дастгирӣ ва ҳамкориҳои судманд изҳор намуданд.